Adeiladu ar gyfer dyfodol Bwrdeistref Sirol Pen-y-bont ar Ogwr

Croeso

Croeso i Gyngor Bwrdeistref Sirol Pen-y-bont ar Ogwr. Rydym wrth ein bodd eich bod yn ystyried ymuno â’n tîm ar yr adeg gyffrous hon o drawsnewid a thwf. Rydym yn gyffrous ein bod wedi gallu creu’r swyddi newydd hyn fel rhan o’n rhaglen newid corfforaethol. Yn y rhaglen hon byddwn yn buddsoddi’n gorfforaethol i gyflymu ein rhaglen newid drwy dri galluogwr allweddol – perfformiad, gweithlu a newid digidol.

Mae Bwrdeistref Sirol Pen-y-bont ar Ogwr yn cwmpasu tua 100 milltir sgwâr gyda phoblogaeth o 145,000. Mae gennym ddaearyddiaeth amrywiol, gyda chymoedd hardd yn y gogledd a 12.5 milltir o arfordir a thraethau i’r de. Mae’r M4 yn rhedeg drwy ganol y fwrdeistref sirol, ac mae gennym gysylltiadau rheilffordd prif linell â Chaerdydd, Llundain ac Abertawe. Mae’r sir yn tyfu gyda chanolfan ddata ranbarthol newydd yn cael ei datblygu a datblygu diwydiant a gwyddorau bywyd yn ne Cymru. Er bod gennym rai heriau yng ngogledd y sir ac angen buddsoddi yn ein cymoedd, byddwch yn ymuno â sir lle mae’r boblogaeth a’r economi yn tyfu. Mae prosiectau adfywio sylweddol ar y gweill gyda Phorthcawl yn flaenllaw fel y rhaglen adfywio arfordirol fwyaf yng Nghymru. Mae gwasanaethau craidd mewn meysydd fel gwasanaethau cymdeithasol ac addysg yn gryf iawn gyda llawer o’r gwasanaethau hyn yn rhagorol. Mae ein cyllid yn gymharol gryf ac yn darparu sylfaen gadarn i ni edrych ymlaen yn hyderus.

Mae’n awdurdod croesawgar sy’n awyddus i symud ymlaen yn gyflym. Mae gennym gyngor a chabinet sy’n uchelgeisiol iawn ac sydd wedi creu’r swyddi newydd hyn i ddarparu capasiti ar draws yr awdurdod i’n galluogi i gyflawni trawsnewid a newid. Bydd ymuno â ni ar yr adeg hon yn eich galluogi i fod yn rhan o dîm ar ddechrau rhaglen gyffrous o newid sy’n cael ei datblygu fel rhan o strategaeth drawsnewid newydd a fydd yn gosod gweledigaeth ar gyfer Pen-y-bont ar Ogwr yn 2040. Bydd y swyddi yn canolbwyntio ar bedwar galluogwr allweddol – gweithlu, technoleg, rheoli rhaglenni a phrosiectau a pherfformiad

Mae Cyflawni gyda’n gilydd – Cynllun Corfforaethol 2023–28 yn nodi ein gweledigaeth uchelgeisiol ar gyfer y dyfodol, gan sicrhau ein bod yn darparu gwasanaethau o ansawdd uchel, integredig sy’n grymuso unigolion a chymunedau. I fod yn rhan o’n tîm bydd angen i chi fod yn angerddol, yn wydn, yn ymrwymedig ac yn greadigol. Yn gyfnewid, byddwch yn cael y rhyddid i helpu i lunio dyfodol ein gweithlu a’n cyngor, gan ysgogi gwelliannau ac effeithlonrwydd er mwyn sicrhau bod ein hadnoddau’n cefnogi ein pobl a’n lleoedd.

Ar y safle hwn gallwch ddod o hyd i ragor o wybodaeth am Fwrdeistref Sirol Pen-y-bont ar Ogwr, y Cyngor, a manylion am y ddwy rôl allweddol hyn – Pennaeth Perfformiad a Newid Diwylliannol y Gweithlu a Phennaeth Trawsnewid a Digidol.

Mae gennym uchelgeisiau enfawr i’n sefydliad, partneriaethau, ein pobl a’n cymunedau, ac rydym am i chi chwarae rhan yn hyn.

A chithau’n gydweithredwr ac arloeswr cryf, byddwch yn ysbrydoli cydweithwyr a phartneriaid ar draws Bwrdeistref Sirol Pen-y-bont ar Ogwr a De Cymru ac yn dylanwadu arnynt ac yn parhau i ddod o hyd i ffyrdd arloesol o newid bywydau a gwella canlyniadau ar gyfer ein trigolion, ein cymunedau a’n busnesau.

Os ydych yn teimlo bod gennych y sgiliau a’r hanes sydd eu hangen ac rydych yn gallu cyfuno hyn ag ymdeimlad gwirioneddol o uchelgais ar gyfer ein cymunedau, y cyngor a’r fwrdeistref sirol ar yr adeg gyffrous hon, byddem wrth ein bodd yn clywed gennych.

Dymuniadau gorau,