Adeiladu ar gyfer dyfodol Bwrdeistref Sirol Pen-y-bont ar Ogwr

Croeso

Croeso i Gyngor Bwrdeistref Sirol Pen-y-bont ar Ogwr. Diolch am eich diddordeb yn yr hyn sy’n un o’r rolau arwain pwysicaf yn ein sefydliad. Rydym yn chwilio am unigolyn eithriadol i ddod yn Bennaeth Gwasanaethau Plant a Theuluoedd nesaf i ni, sef rôl sy’n cynnig cyfle unigryw i wneud gwahaniaeth parhaol i fywydau plant, pobl ifanc a theuluoedd ledled y fwrdeistref sirol.

Mae Bwrdeistref Sirol Pen-y-bont ar Ogwr yn cwmpasu tua 100 milltir sgwâr ac mae’n gartref i fwy na 145,000 o drigolion. Wedi’i lleoli rhwng Caerdydd ac Abertawe, gyda chysylltiadau trafnidiaeth rhagorol, arfordir trawiadol, cymunedau bywiog a threftadaeth ddiwydiannol falch, mae Pen-y-bont ar Ogwr yn lle uchelgeisiol gyda chyfleoedd sylweddol o’n blaenau. Mae rhaglenni adfywio mawr yn trawsnewid lleoliadau allweddol ar draws y fwrdeistref sirol, gan helpu i greu dyfodol ffyniannus i drigolion, busnesau ac ymwelwyr fel ei gilydd.

Wrth wraidd ein huchelgeisiau mae ymrwymiad i sicrhau bod pob plentyn yn cael y dechrau gorau posibl mewn bywyd, yn ddiogel rhag niwed ac yn cael ei gefnogi i gyflawni ei botensial llawn. Mae ein dull wedi’i adeiladu ar ymyrraeth gynnar, atal, ymarfer sy’n seiliedig ar gryfderau a gweithio ochr yn ochr â theuluoedd i feithrin gwydnwch a chyflawni canlyniadau cadarnhaol a pharhaol.

Rydym yn falch o’r cynnydd a wnaed yn ein Gwasanaethau Plant. Mae ein hymrwymiad i blant, pobl ifanc a theuluoedd wedi’i gydnabod gan Arolygiaeth Gofal Cymru, a nododd fod arweinwyr Pen-y-bont ar Ogwr wedi blaenoriaethu gwasanaethau plant yn gyson, gan gefnogi gwelliannau parhaus ac amserol a chryfhau’n sylweddol ansawdd a darpariaeth swyddogaethau gwasanaethau cymdeithasol. Rydym bellach yn chwilio am arweinydd a all adeiladu ar y sylfeini cryf hyn a helpu i lunio pennod nesaf ein taith.

Fel ein Pennaeth Gwasanaethau Plant a Theuluoedd newydd, byddwch yn aelod allweddol o dîm arwain y Cyngor. Gan weithio’n agos gyda chydweithwyr ar draws y Cyngor a chyda phartneriaid ym maes addysg, iechyd, plismona, y trydydd sector a sefydliadau rhanbarthol a chenedlaethol, byddwch yn darparu arweinyddiaeth strategol ar draws gwasanaethau gofal cymdeithasol plant a chymorth i deuluoedd. Byddwch yn arwain y gwaith o gyflawni ein blaenoriaethau, yn ysgogi gwelliant parhaus ym maes diogelu, atal ac ymyrraeth gynnar, cynllunio gofal, perfformiad a chanlyniadau i blant a theuluoedd.

Mae hon yn rôl i arweinydd profiadol sy’n cael ei ysgogi gan werthoedd a all arwain ac ysbrydoli gweithlu amrywiol ac ar draws partneriaethau amlasiantaeth, cynnal ansawdd ymarfer a chreu’r amodau system ar gyfer timau sy’n perfformio’n dda. Byddwch yn gyfrifol am feithrin diwylliant o ddysgu, gwella ac arloesi parhaus wrth sicrhau bod plant a theuluoedd yn parhau wrth wraidd gwneud penderfyniadau. Byddwch yn gweithio ar draws ffiniau sefydliadol, yn cryfhau partneriaethau ac yn cefnogi dull system gyfan o wella canlyniadau i blant, pobl ifanc a theuluoedd.

Byddwch yn ymuno â sefydliad sydd â gweithlu talentog ac ymroddedig, aelodau etholedig cefnogol, partneriaethau cryf a phenderfyniad clir i wella canlyniadau a chyfleoedd bywyd i blant a phobl ifanc. Rydym yn chwilio am weithiwr proffesiynol gwaith cymdeithasol cymwysedig sydd â dealltwriaeth drylwyr o’r dirwedd ddeddfwriaethol, polisi ac ymarfer sy’n effeithio ar wasanaethau plant a gweledigaeth glir ar gyfer sut y gall cymorth cynnar, atal, cymorth i deuluoedd, ymarfer sy’n seiliedig ar gryfderau a gwasanaethau sy’n canolbwyntio ar ganlyniadau weithio gyda’i gilydd i gyflawni’r canlyniadau gorau posibl.

Rydym am glywed gan arweinwyr sydd wedi ysgogi gwelliant cynaliadwy yn llwyddiannus mewn gwasanaethau plant a theuluoedd, sydd wedi cryfhau rhwydweithiau teuluol a chymunedol, lleihau’r angen am ymyrraeth statudol lle bynnag y bo’n bosibl, gwella profiadau plant mewn gofal a’r rhai sy’n gadael gofal, ac sydd wedi cyflawni gwelliannau mesuradwy mewn canlyniadau. Drwy eich arweinyddiaeth strategol, eich angerdd a’ch tosturi byddwch yn chwarae rôl ganolog wrth sicrhau bod pob plentyn a pherson ifanc ym Mhen-y-bont ar Ogwr yn cael y cyfle i ffynnu.

Ar y wefan hon gallwch ddod o hyd i ragor o wybodaeth am Gyngor Bwrdeistref Sirol Pen-y-bont ar Ogwr a manylion am y rôl arweinyddiaeth bwysig hon, Pennaeth Gwasanaethau Plant a Theuluoedd.

Mae gennym uchelgeisiau mawr ar gyfer ein plant, ein pobl ifanc, ein teuluoedd a’n cymunedau. Os ydych yn rhannu ein gwerthoedd, yn meddu ar y profiad arweinyddiaeth i ysbrydoli eraill ac yn angerddol am wella bywydau, byddem wrth ein bodd yn clywed gennych.

Dymuniadau gorau,